Paperezkoak - Azken Alea
Laster baten

Elektrizidade eta sukaldaritza ikastaroak

Urtailean bere programazinoari ekin deutso Ilgoran Andren Jabekuntza Eskoleak.

Aurreko hamabostaldian hasitako ¡Va por ellas! ikastaroaz gainera, beste ikastaro bi dira hastekoak; bata, etxean elektrizidadeko konponketak egiten ikasteko eta bestea, sukaldaritza begetariano, ekologiko eta osasungarriaren gainekoa.
Auri Vallejo Sanz-ek emongo dau elektrizidade ikastaroa. "Elektrizidadeak zelan funtzionetan dauan ulertu ostean, mundu barri bat zabaldu jatan, eta mundu horretan autosufizientea naz" azaldu dau trebatzaileak. Ikastaro honen bitartez partaideak be arlo horretako konponketak egiteko kapaz izatea bilatzen da. Urtailaren 22, 23 eta 24an izango da Lemoan. Barikuan, hilak 22, 18:00etatik 20:00etara izango da tailerra eta zapatu eta domekan 10:00etatik 13:00etara.
Sukaldaritza begetarianoko ikastaroak zati bi izango ditu. Lehenengoa, hilaren 25ean hasi eta zezeilaren 22ra arte izango da hamabostero eta bigarren zatia martiaren 15etik maiatzaren 10era, hau be hamabostero, 18:00etatik 20:30era, Arantzazuko sukaldean. Marta Marimon izango da trebatzailea eta ikastaroan, ikuspegi feministatik, elikadura-burujaubetza landu gura da, kapitalismo patriarkalaren elikadura globalizau eta industrializatuaren alternatibak sortu ahal izateko.

Omentzeko ikastaroa martxan
Hareen omenez izeneko ikastaroaren bigarren eta hirugarren saioak izango dira Zeanuriko Kultur Etxean 17:45etik 19:45era. Ahalduntze prozesuetan argia eta gida izan diran andrazko anonimoak ezetu, aitortu eta omenduko ditue partaideak.

Zaharren egoitzetan hasi dira txertoak ipinten

Dimako Piedadeondo egoitzan urtailaren 12an hartu eben txertoa egoiliarrak eta txanda horretan egoazan zahar etxeko beharginak; Zeberioko Eusebio Aldekoa eta Arbildu egoitzetan, 14an; Bediako Jandonizen be hartu dabe lehenengo dosia eta Dimako Arratiako egoitzan barriz, 19an hasiko dira txertoa ipinten. Izan be, atzeratu egin behar izan dabe COVID-19 agerraldi bat gertatu dalako. Gaixorik dagozanai gaixotasuna gainditu ahala eta Eguneko Zentrokoai be ipiniko jakie txertoa egoitzan bertan.

Egoitzako agerraldia
Guztira 10 behargin eta 39 egoiliar kutsatu dira Arratiako egoitzan agerraldia hasi zanetik. Urtailaren 15ean, 10 langile horreetatik, 3 beharrean egozan PCR frogan negatibo emon ostean; beste 4, emaitzen zain, eta beste 3 isolamentuan.
Egoiliarrai jagokienean barriz, agerraldia hasi zanetik 3 egoiliar hil dira, baina "ez dira COVID-19aren eraginez hil". Gaixorik dagozan egoiliarrak artatzeko Birjinetxe eta Unbe Laguntza Zentroetara aldatzen ditue batzuk, eta urtailaren 15ean, 16 egozan Birjinetxen, 1 Unben eta 17 Arratiako Egoitzan. Birjinetxetik egoiliar 2 itzulita egozan sendatuta; eta, Andere Ortuzar Arratiako Udalen Mankomunitateako presidentearen arabera, euren familien esanetan, beste 2 itzultzekoak ziran astegoienean. Astelehenean, hilak 18, Unben egoana zan itzultzekoa. Eta martitzenerako egoitzan dagozan 7 egoiliar gehiago guztiz sendatuta egotea espero ebala medikuak azaldu eban Ortuzarrek.

Greba Osakidetzan
Satse, ELA, LAB, CCOO, UGT eta ESK sindikatuak Osakidetza zentro guztietan greba deialdia egin dabe urtailaren 28rako baliabide gehiago eskatzeko. Izan be, euren esanetan Osakidetzaren egoerea larriari bueltea emoteko, "osasun publikorako EBko batez bestekoaren parekoa dan aurrekontu-partidea, osasun-aurrekontuaren %25 Oinarrizko Laguntzara bideratu; plantilla handitu ezkutuan dagozan enpleguak egiturazko plantillan sartuz; behin-behineko langileak finkatu; murrizketa guztiak itzuli; zerbitzu pribatizatuak itzuli, eta langileen osasuna eta segurtasuna bermatzeko neurriak hartu" behar dira.

Mobilidadea murriztuago
Urtailaren 13an, Lehendakariaren dekretu baten bitartez, neurri barriak ipini ziran indarrean, gitxienez, zezeilera arte egongo diranak. Neurriok joan-etorriak gehiago murriztuten ditue eta, salbuespenak salbuespen, ezin da lurralde historikotik urten; eskola kirola baimendu dabe, eta ez dira aldaketarik ezartzen ostalaritzan edo etxeratze aginduaren orduan.

Enpresa txikientzako dirulaguntzak eskatu daitekez

Arratia-Nerbioiko Landa Garapenerako Alkarteak lagunduko deutse eskatzaileai, enplegua sortu eta enpresak garatuteko Eusko Jaurlaritzako Erein eta Leader programai jagokiezan dirulaguntzak tramitetan. Ekintzailetzarako, enpresak sortu, handitu eta modernizetako, besteren kontura kontratetako eta udalerrien azpiegiturak eta oinarrizko zerbitzuak egin eta barriztatuteko dira dirulaguntzok. Erein programakoak urtailaren 31ra arte eskatu daitekez eta Leader programakoak zezeilaren 28ra arte.
Aurten nobedade moduan, Leader programeak etxebizitzarako be emongo ditu dirulaguntzak. Helburua, beste eremu batzuetatik etorritako etorkizuneko herritarrai etxebizitza bat eskuratzen lagundutea da. Leader dirulaguntzak Arantzazu, Artea, Bedia, Dima, Ubide, Zeanuri eta Zeberiokoak eskatu leikiez. Erein programakoak barriz, Areatza, Igorre eta Lemoakoak.

Jantza afrikar saioa Lemoan

Afrikako Kulturearen Mundu Egunaren harira Lemoako Udalak jantza afrikar saioa antolatu dau urtailaren 24rako, Quinndy-ren gidaritzapean. Kiroldegian izango da 10:30etik 13:00etara, 150 personako gehienezko aforoagaz. Izena hilaren 21era arte emon daiteke www.lemoa.net webgunean. Bertaratutakoak Afrikako herrialdeetako jantzetako oinarrizko pausuak ikasiko dabez, afrikar musikearen erritmoan.
Quinndy-k, Afrikako Komunidade Baltzeko aktibisteak Afrosession proiektua ipini eban martxan 2019an, fitness eta jantza jarduerak buztartuz.
Bilboko San Frantzisko auzoan Saharaz hegoaldeko jatorriko personak sortutako mikroenpresa sozialen haztegia dan Koopsf34 ekimenaren parte da Afrosession.

Zeanuriko bertso saioa hamazazpigarrenez, eten barik

Zeanuriko Kultur Batzordeak antolatuta, urtailaren 24an, puntako bertsolariai entzuteko aukerea egongo da.

Bertso saioaren hamazazpigarren edizino honetako kartela, Amets Arzallusek, Maialen Lujanbiok, Andoni Egañak, Aitor Mendiluzek eta Unai Iturriagak osotuten dabe. Gai jartzaile beharrak Eñaut Intxaurragak egingo ditu. Frontoian da hitzordua, arrastiko seiretan.
Urtero lez, bertsolaririk onenetakoai entzuteko aukerea egongo da Zeanurin. Izan be, Andoni Egañak, Amets Arzallusek eta Maialen Lujanbiok 1993tik hona jokatutako Bertsolari Txapelketa Nagusi guztiak irabazi dabez. Oingo Euskal Herriko txapelduna Maialen Lujanbiok, 2017 eta 2009koak; 2013koa Amets Arzallusek, eta 1993tik 2005a arteko lau txapelketak Andoni Egañak. Aitor Mendiluze eta Unai Iturriaga be hainbatetan izan dira Bertsolari Txapelketa Nagusiko finalista.
Zeanuriko bertso saioan beterano dira Unai Iturriaga eta Andoni Egaña; Maialen Lujanbio be egon zan igazko saioan.

Sarrerak aurrezdik be salgai
Urtailean izaten danez, 2020ko martitik aurrera izandako kultura etenaldiak ez eutsan eragin igaz bertso saioari, eta aurten be, aforo murriztuagaz baina gozatu ahal izango dabe inguruko bertsozaleak hain gustuko daben saioa.
Sarrerak aldez aurretik be erosi ahal izango dira 8 euroan udaletxean 11:00etatik 14:00etara, eta egunean bertan 17:00etan hasita frontoian salduko dira indarrean dagozan COVID-19aren neurriak ezarritako aforoa bete arte.

Insumisinoaren aldeko mobimentuaren gaineko filma eta Lander Garro Igorren

Lander Garrok zuzendutako Bi urte, lau hilabete eta egun bat filma ikusi ahal izango da hilaren 22an, 18:30ean, Lasarte Aretoan. Zuzendaria bera egongo da Igorren filma proiektau ostean berbaldia emoteko.
Filmak derrigorrezko soldadiskearen kontra burrukan egin eben sei lagunen istorioa kontetan dau. Errazoi desbardinak ebezan insumiso izateko: bakezaletasuna, pentsakera anarkistea, abertzaletasuna edo sinismen erlijiosoak, baina seirak gurago izan eben kartzelan egon ejerzitoan baino: urte bi, lau hilabete eta egun bateko kondena ezarri eutseen. Dokumentala euren militantziari eskainitako memoria ariketea da.

Arratiako Kalenturak Lehiaketako irabazleak emongo dira jakitera hilaren 23an

Urtailaren 23an, 19:00etan, izango da ekitaldia Lemoako kiroldegian. Bertso trama erotikoa egongo da ostean; Uxue Alberdik eta Sustrai Colinak bertsotan jardungo dabe eta Arkaitz Estiballes izango da tramagilea.

Aforoa mugatua da, 150 personarentzakoa eta sari banaketa ekitaldia eta ikuskizuna ikusteko, izena hilaren 20ra arte emon daiteke www.lemoa.net webgunean. Zuriñe Yarrituk gidatuko dau ekitaldia eta jostailu erotiko bi zozketatuko dira publikoaren artean.
Igor Estankona, Alvaro Rabelli eta Iratxe Retolazak osotutako epaimahaiak emon dau epaia, baina ez da publiko egingo sari banaketa ekitaldia izan arte. Ha-ta guzti be, kalidade handiko lanak dirala jakin dau BEGITUk. Izan be, Zertu Kultur Elkarteak antolatuten dauan bigarren edizinoa izan arren, lehiaketeak aurretik eukan izena eta idazle ezagunak hartzean dabe parte lehiaketan.

Uxue Alberdi eta Sustrai Colina
Bertsotan Uxue Alberdi eta Sustrai Colina egongo dira, puntako bertsolariak biak. Uxue Alberdi, bertsolaria izateaz gainera, idazlea be bada eta 2020an, euskerazko saiakeraren Euskadi Literatura Saria jaso eban Kontrako eztarritik lanagaz. 2016an be jaso eban Euskadi Saria Besarkada lanagaz. Aulki-jokoa (2009, Elkar), Euli-giro (2013, Susa), Jenisjoplin (2017, Susa) eta Dendaostekoak (2020, Alberdania) dira bere lanik ezagunenak.
Bertsolaritzeari jagokonean, aitatzekoak dira, 2009ko Bertsolari Txapelketa Nagusian finalaurrekora heldu izana eta feminismoaren ikuspegitik bertsolaritzearen inguruan egin dauan lana; tartean, Ainhoa Agirreazaldegigaz batera abiatutako Bertso Eskola Feminista.
Sustrai Colinak sari asko ditu bertsolaritza munduan, tartean Xilaba Bertsulari Xapelketako txapel bi. 2001etik finalista izan da Bertsolari Txapelketa Nagusietan, eta 2017koan, berbarako, hirugarren egin eban. Zuzenbidean lizentziaduna izan arren, kazetari lanetan jarduten dau eta 2016an, Rikardo Arregi Saria jaso eban. Bertso irakaslea be bada Colina.
Tramagile, Zeanurin bizi dan Arkaitz Estiballes bertsolaria ibiliko da. Beste txapel batzuen artean, Bizkaikoak be baditu sari banaketako ekitaldiko bertso tramagileak.

Egin zaitez Begitu-lagun egin zaitez gure lagun

Bizkaia Aurrera Kultura Bonua (BAKB) izenpean, Bizkaian kultura konsumoa bultzatzeko asmoz, bonuak kaleratu zituan BFAk igazko urri lehenengoan. Bonu honeek Begitu-lagun izateko aukera parebakoa eskaintzen dabe; izan be, bonuokaz, Begitu-lagun egin ezkero, Begitu-lagun barriak 15 euro pagau eta BEGITUk 40 euro jasoko dauz. Bonuak zemendian amaitu ziran arren, aurretik eskuratu ebezenak maitzaren 31ra arte erabili leikiez. BEGITU hobetuteko baliabide ekonomikoak behar dirala eta 2021ean be, 50 Begitu-lagun barri egiteko kanpainea ipini dau martxan aldizkaria kudeatzen dauan Zertu Kultur Elkarteak. Arrainak ura eta akerrak mendia biziteko behar badau, zuk Begitu-laguna izan behar dozu begituk bizitzaren gauzarik politenak kontetan segidu dagian.
Bonurik euki ez arren be edonor egin leiteke Begitu-lagun 35, 55 edo 75 euroren truke urtean. Gainera egiten diranen artean Garena jatetxean lagun birentzako menu degustazinoa zozketatuko da aprilean. Holan egin dau begituk abenduan be, Begitu-lagun egin diranen artean menua zozketatu dogu eta irabazlea Saioa Zubiaur izan da.

Opariak trukean
Begitu-lagun barriak opari moduan, telazko boltsa bat, besoko argi islatzailea eta zortzi liburu jasoko ditu, eta Dimako Garena jatetxean lagun birentzako degustazino menuaren zozketan sartuko da.
Liburuok Angel Larrea eta Juan Rekalderen Arratia Inguruko Hiztegia eta Berbategitxoa, Alvaro Rabelliren Ustezko fikzioak eta Saguzarren profhezia, Peru Tximaluze alemaniar ipuin klasikoaren euskerazko bersinoa, Arratia Musika Eskolako 25 urteurreneko monografia eta Iker Yurrebasoren Haizea aurpegian dira. Nerea Zuloaga eta Iratxe Andikotxearen Kontaidazu! Kantaidazu! ipuin eta abestien liburu-CDa be eroango dabe Begitu-lagun barriak.

Begitu  
Herriak
Kulturea
Kirolak
Begitandu
Begitu eta Zertu
Geure produktuak
Argazki eta bideoak
Zerbitzuak
Estekak
Begitulagunen txokoa
Hartu-emonetarako
Harpidetzak
Agendea
Iragarki laburrak
Inkesta
ZERTU Kultur Elkartea
Herriko Plaza 24, 48142 Artea
Telefonoa: 946 317 314

begitu@topagunea.com
Diseinua eta programazinoa: AIKOX INFORMÁTICA Y PUBLICIDAD