Paperezkoak - Azken Alea
Laster baten

Etxerat-ek menuak salduko ditu aprilaren 24an

Etxerat, preso politiko, senide eta errepresaliaduai sostengua emoten deutsan taldeak, udabarrian Bazkaria etxera! Plater bete elkartasun ekimena prestatu dau dirua batzeako. Aprilaren 24an, bazkariak prestatuko dabez Diman eta Lemoan. Areatzan, Artean, Diman, Igorren, Lemoan eta Zeanurin aukerea egongo da eskatu eta menu horreek etxera eroateko.
Prezioa bardina izan arren, 15 euro, menu diferenteak prestatuko dabez Diman eta Lemoan. Pasta ensaladea, solomoa piperrakaz eta arroz-esnea Diman, eta baba gorriak eta postrea Lemoan.
Etxerat taldearen egoera ekonomikoa gero eta larriagoa da. "COVID-19a dala eta, aurten be ezinezkoa izango da alkartasun eguna betiko moduan ospatzea" eta "tarte luzean txosna barik ez dago modurik dirurik aterateko" jakinarazo dabe taldetik. Horregaitik ipini dabe martxan ekimen hau.

Parte hartzeako
Bazkaria eskatzeko herri bakotxean bertako telefonora deitu edo mezua bialdu behar da hilaren 21a baino lehen.
Aprilaren 24an, Artean, 14:00etatik 14:30era jasoko da bazkaria udaletxe aurrean (600 389 055); Areatzan, ordutegi berean, Gudarien Plazan (688 879 713); Diman, 13:30etik 14:30era eskoletan (688 733 965); Igorren, 13:45etik 14:15era, Herriko Tabernan (699 919 085); Lemoan, 13:30etik 14:30era Gaztetxe azpian (656 799 612) eta Zeanurin, Kultur Etxe azpian 14:00etatik 14:30era (620 253 725).

Bonodenda kanpainea aprila eta maiatzean zehar izango da

Ohiko Bonodenda kanpainea ipini dabe martxan Igorreko Udalak eta AME merkatarien alkarteak. Herriko merkataritzea bultzatzeko helburuagaz, 1.800 bonu ipini ditue salgai. Aurreko urteetan baino bonu kopurua handiagoa da, dirulaguntza handiagoagaz %25etik, %33ra pasau da, eta atxikitutako komertzioak be aurreko urteetan baino gehiago dira.

Maiatzaren 15era arte edo amaitu arte erosi ahal izango dira bonuak eta maiatzaren 31ra arte erabili ahal izango dira. Bonu bakotxa 10 euroren truke eskuratuko da baina 15 euroko balioa izango dau. Gehienez hiru bonu erosi daikez persona bakotxak. Salmenta Igorren erroldatutako jentearentzat aprilaren 15ean hasi zan eta besteentzat aprilaren 23an, Mandoia kaleko Kultur Etxeko leihoan astelehen, martitzen, eguen eta barikuetan 10:30etik 12:30era eta eguaztenetan 18:00etatik 20:00etara.

Atxikitutako komertzioak
Bonuak hurrengo dendetan erabili ahal izango dira; Ainara Kirolak, Aldeiturriaga Oinetakoak, Arrabike, Arratek, Arratia Informatica, Axular Herriko Taberna, Belaustegui Joyeros, Bihotza Estetika Zentroa, Bizarginak, Surya Estetika Zentroa, Haize Natura Estetika Zentroa, Decoración y Pintura Igorre, Dia Autozerbitzua, Doner Kebab Igorre La Bodeguilla taberna, Donibane taberna, Edur Zapata Konponketa, Egibe Edertasun Zentroa, Enar Kirolak (Maran Kirolak), Erroitz, Expert Arratia, Iru Deko Burdindegia, Beatriz Fruta-denda, Pino Fruta-denda, Garaje Felipe, Garden Igorre, Goloski, Grelmar, Hamburgueseria Ikusgarri, Ilestyle ileapaindegia, Iratxo Oinetakoak, Jubiladuen taberna, K2 Jatetxea (Batzokian), Kantabriko Arraindegia, Kili Kili, Kirru Ileapaindegia, Klitz, Kukuma taberna, Lorane, Marrak Paperdenda, Muebles Igorre Altzariak, Mugarri Interiorismo, Nati ileapaindegia, Olaetxe Optika, On Egin, Orrie Paperdenda, Lanbreabe okindegia, Politte!, Rekalde Harategia, Sein, Troka, Txaparro jatetxea eta Zazpi Haizetara.

Repsol gidak Garena jatetxea saritu dau

Repsol gidak Eguzki sariak banatu ebazan aprilaren 12an Donostiako Maria Eugenia antzokian. 96 jatetxe saritu ebezan guztira eta saridunen artean Dimako Garena jatetxea dago, Eguzki bat jaso eban Garenak.
"Garenak bere ibilbidea aldats gora hasi behar izan eban. Sano ekaitz gogorrari aurre egin eta gero, atzenean eguzkia atera da! Mila esker lagundu gaituzuen guztioi, gure ondoan egon eta gugan sinistu dozuenoi. Mila esker lantalde osoari, zuek zarie proiektu honen arnas. Baina batez be zorionak eta eskerrik asko Garenaren bihotzari, zu barik hau ez litzateke posible izango Julen Baz" adierazo eben Garenakoak sare sozialetan.

Mendi ibilaldietan egindako argazkien erakusketea Igorren

Ganzabal Mendi Taldearen Mendirik mendi argazki erakusketea ikusgai dago aprilaren 12tik Igorreko Kultur Etxeko erakusketa gelan, maiatzaren 10era arte. Ikusi ahal diran argazkiak, aurreko urteetan Ganzabal Mendi Taldeko kideak egindakoak dira, Mendia eta Natura gai hartuta, eta aurten taldeak antolatuten dauan argazki lehiaketara aurkeztu diranak.
Guztira 20 egileren 38 argazki dagoz ikusgai.

Hamahiru sari
Hamabi irabazle aukeratu ditu Ganzabalek eta beste saria herritarrak emondakoa da. Joseba Undurragaren Espuguesttes aterpea izeneko argazkiak sari bi jaso dauz; herritarrena eta mendi taldeak emondako hamabi sarietako bat. Undurragaren beste argazkia Cuyalaret izenekoa be saritua izan da. Jon Tubeten Etena argazkia; Izaskun Martinen Urdin guztiak batera; Ismene Leizaren Laino artean; Alberto Barraganen Perdiguero eta Bi hitzetan Zora Garri; Jose Batanaren El Tuercas; Andoni Linazaren Amanecer en el Teide; Miren Garbiñe Etxebarriaren Udazken koloreak; Ana Gonzalezen Ocres eta Jon Ander Linazaren Campo 1 argazkiak be saritu ditue.

Lokal barria
Ganzabal Mendi Taldeak lekuz aldatu dau egoitzea. Aprilaren 14tik Arraibi auzoan 2, lehengo Udal Liburutegian dago eta eguaztenetan 19:00etatik 20:30era egoten dira bertan. Telefono finkoa ez dago erabilgarri eta 675 701 359 da Ganzabalen telefonoa.

Auzo bizitza Diman 1800-1936 liburuaren aurkezpena Diman

Dimako Antzasti-Euskaldunon Etxea museoak argitara emon dau Abel Ariznabarretaren atzen lana. Liburuaren aurkezpena Dimako eskolako kamaran izango da aprilaren 23an, barikua, arrastiko 18:00etan.
"XIX. mendearen hasikeratik 1936ko Gerra Zibilaren hasikerara mugatzen dan epean aldaketa esanguratsuak gertatu ziran gure inguruan. Landa komunidade txikia dan Dima herrian gizarte antolaketa ardatz hartuta, aldaketa guzti horreek azaleratzen ditu lan honek. Bertan, personak hartu-emon sozialen munduan txertatzen diran egitura artikulau tinko bat ikusten da, etxetik abiatuta, "etxea" da-eta gizabanakoak inguruko esparru sozialean –auzoa eta herria eta euren erakundeetan: Kofradia eta Elizatea– parte hartzerakoan berau identifiketako erreferentzia nagusia. Hori guztia garatuz eta aldatuz joan da XIX. mendearen eta XX.aren hasikeran zehar emon diran gertaera politiko eta aldaketa sozialen baitan" dino Ariznabarretak.
Andoni Egaña eta Gari Otamendi izango ditu lagun Ariznabarretak aurkezpenean. Aforoa bermatzeko izena emon behar da 685 759 997 telefonoan edo kultura.dima@bizkaia.org helbide elektronikoan.

Lemoak badauka bere Kultur Etxea

Obrak 2021eko aprilean amaitu dira eta hilaren 24an ate irekierea egingo dabe herritarrai etxea erakusteko bisita gidatuen bidez. Prozesu parte-hartzailea eta luze baten ondorioa da Kotxepin Kultur Etxea eta aprilaren amaieran hasiko da funtzionamentuan, ate irekien egunaren ostean. Lehenengo bisita gidatua Kotxepin Bengoetxearen familiakoak eta Kultur Etxearen diseinuan parte hartu dauan talde eragilearentzat izango da.

"Bizi dogun egoera hau izanik ezin dogu egin buruan geunkan inaugurazino ekitaldia gura genduan moduan" azaldu deutso BEGITUri Esti Carracedo Kultura Teknikariak. Eta horregaitik, ate irekierea antolatu dabe herritarrai bisitak eskainiz. Bisitak 11:00etatik 14:00etara izango dira, ordu laurdenero, taldetan. Izena hilaren 20ra arte emon daiteke udal webgunean.

Ate irekierea
Bisita horreetan bertaratuak espazio guztietatik ibiliko dira ikusten Kotxepin Kultur Etxeak eskaintzen dauana, musika esperimentala entzun bitartean. Lumi musika taldea, beren-beregi Kotxepin Kultur Etxeko ate irekiera girotzeko, ikuskizun bat sortzean dabil "egun horretan garatuko dauana. Ordu biz egongo da musikea zuzenean bertan".
Kultur Etxea ezetu, eta bertan emongo diran zerbitzuen barri jakiten lehenengoak, Kotxepin Bengoetxea Etxebarriaren familiakoak izango dira. "Kotxepinen lau neba eta ahiztai emon jakie konbidapen berezia eta familiari harrerea egingo deutsagu, prozesu parte-hartzailean lan egin dauan talde eragileagaz batera" dino teknikariak.
 
Kotxepin Bengoetxea
Kultur Etxearen izenerako hainbat proposamen jaso ebazan Udalak. "Kultur Etxearen espazioak definidu eta diseinetako parte hartu dauan talde eragileagaz batera, Kultur Etxeari izena emoteko proposamenak ekarteko aukerea zabaldu genduan herrian. Batzuk planteau ziran eta horreetako bat Kotxepin izan zan, andra honek egindako lanagaitik. Batez be euskerearen alde egin eban behar. Talde eragileak ebatzi eban hori izango zala gure Kultur Etxeak hartuko eban izena".
Kotxepin Bengoetxea Etxebarria (1949-1987) lemoaztarra zan eta lan handia egin eban Lemoan euskerearen eta kulturearen alde Euskal Herri mailan.

Prozesu luzea
2012an hasi zan Udala Lemoak ebazan aisi eta kultura espazioak baloretan eta ikusi eban herrian egozan alkarte eta egiten ziran ekintzetarako leku faltea egoala. Espazio barri baten bila hasi ziran eta 2016an Bizkaiko Gotzaindegiagaz abadetxearen 40 urteko lagapena sinatu eban, Kultur Etxea egiteko asmoagaz.
Urte berean, Udaleko aisialdi eta kultura zerbitzuak, Kultur izeneko proiektua abiatu eban Maraka taldearen laguntzeagaz, aisialdi eta kultur zerbitzuak berrantolatu eta abadetxeari ze erabilera emon eta horretarako ze espazio behar ziran aztertuteko.
Lan saio asko behar izan ebazan talde eragileak etxearen espazioa lemoaztarren kultura preminetara moldatzeko. Aprilaren 24an ikusi ahal izango da lan guzti horren emaitza eta egun horretatik aurrera martxan izango da Lemoako Kotxepin Kultur Etxea.

Erreka Mari umeentzako txotxongilo ikuskizuna Bedian

Aprilaren 23an, Liburuaren egunean, Bediako liburutegian, Rosa Martinezen txotxongilo taldeak Erreka Mari lanaren emonaldia eskainiko dau 18:00etan, 3 urtetik gorako umeentzat.
Erreka Mari antzezlana euskal pertsonaia mitologiko baten oinarritzen da, azken laminan, hain zuzen be. Erreka Marik eta Martinek, herriko biztanleen aldetik jasan behar dituen arazo eta eragozpenak kontetan dauz umorez. Erreka Mari Euskal Herriko azken lamina da; izan be, "hainbeste zikinkeria, inbidia eta marmarrakaz, nekez bizi daitekez oindino laminak" Euskal Herrian.

Netflix-eri euskeraz emitiduteko eskatzeko sinadurak batzean dabiz

6.000 sinaduratik gora lortu ditu Netflix Euskaraz ekimen herritarrak eta herritar horreen artean, hainbat arratiar dagoz.
Netflix plataformeak euskal hiztunen eskubideak ez dauzala beteten eretxita, herritar batzuek, tartean Arratiakoak, sinadura batze kanpaina bat abiatu dabe. Helburua, aprilaren 15erako 10.000 sinadura lortzea da. Helburua ez dala Netflix promozionetea dinoe bultzatzaileak, euskal hiztunen eskubideak errespetetea eta plataformeari euskeraz emitiduteko eskatzea baino.
Izan be, Netflixek estaduan jarduteko baimena euki arren, ez dau euskerea kontuan hartzean eta Netflix Euskaraz mobimentu herritarra sortu zan zezeilaren 16an "Netflixeri edukiak euskeraz emitidu dagiazala eskatuteko". Ekimenaren bultzatzaileen arabera, "Netflixek eta beste streaming plataformak etekin ikaragarriak ditue, eta ez deutsie lekuan lekuko errealidade soziolinguistikoari begiratzen". Gainera, "plataforma honeek dituen irabazi erraldoien zati nabarmen bat bertako ikus-entzunezko lanetan inbertiduteko behartu egin behar jakie, baita euskeraz be".
Mundu mailako ikus-entzunezkoen plataforma pribadu handiena da eta Madrilen dauka Europako egoitzea. Plataforma horregaz hasi arren, ekintzaileen asmoa "indarrak batu eta ikus-entzunezkoen industria osoari euskerea aintzat hartzea exijidutea" dala adierazo dabe.

Egin zaitez Begitu-lagun egin zaitez gure lagun

Bizkaia Aurrera Kultura Bonua (BAKB) izenpean, Bizkaian kultura konsumoa bultzatzeko asmoz, bonuak kaleratu zituan BFAk igazko urri lehenengoan. Bonu honeek Begitu-lagun izateko aukera parebakoa eskaintzen dabe; izan be, bonuokaz, Begitu-lagun egin ezkero, Begitu-lagun barriak 15 euro pagau eta BEGITUk 40 euro jasoko dauz. Bonuak zemendian amaitu ziran arren, aurretik eskuratu ebezenak maitzaren 31ra arte erabili leikiez. BEGITU hobetuteko baliabide ekonomikoak behar dirala eta 2021ean be, 50 Begitu-lagun barri egiteko kanpainea ipini dau martxan aldizkaria kudeatzen dauan Zertu Kultur Elkarteak. Arrainak ura eta akerrak mendia biziteko behar badau, zuk Begitu-laguna izan behar dozu begituk bizitzaren gauzarik politenak kontetan segidu dagian.
Bonurik euki ez arren be edonor egin leiteke Begitu-lagun 35, 55 edo 75 euroren truke urtean. Gainera egiten diranen artean Garena jatetxean lagun birentzako menu degustazinoa zozketatuko da aprilean. Holan egin dau begituk abenduan be, Begitu-lagun egin diranen artean menua zozketatu dogu eta irabazlea Saioa Zubiaur izan da.

Opariak trukean
Begitu-lagun barriak opari moduan, telazko boltsa bat, besoko argi islatzailea eta zortzi liburu jasoko ditu, eta Dimako Garena jatetxean lagun birentzako degustazino menuaren zozketan sartuko da.
Liburuok Angel Larrea eta Juan Rekalderen Arratia Inguruko Hiztegia eta Berbategitxoa, Alvaro Rabelliren Ustezko fikzioak eta Saguzarren profhezia, Peru Tximaluze alemaniar ipuin klasikoaren euskerazko bersinoa, Arratia Musika Eskolako 25 urteurreneko monografia eta Iker Yurrebasoren Haizea aurpegian dira. Nerea Zuloaga eta Iratxe Andikotxearen Kontaidazu! Kantaidazu! ipuin eta abestien liburu-CDa be eroango dabe Begitu-lagun barriak.

Begitu  
Herriak
Kulturea
Kirolak
Begitandu
Begitu eta Zertu
Geure produktuak
Argazki eta bideoak
Zerbitzuak
Estekak
Begitulagunen txokoa
Hartu-emonetarako
Harpidetzak
Agendea
Iragarki laburrak
Inkesta
ZERTU Kultur Elkartea
Herriko Plaza 24, 48142 Artea
Telefonoa: 946 317 314

begitu@topagunea.com
Diseinua eta programazinoa: AIKOX INFORMÁTICA Y PUBLICIDAD