Paperezkoak - Azken Alea
Laster baten

Tamainu handiko hondakinak batzeako zerbitzua etenda

Arratiako Udalen Mankomunitateak (AUM) eta Arratia-Nerbioi eskualdeko udalak, Zeberioko Udala, tartean; COVID-19 koronabirusa dala-eta, alarma egoereak iraun bitartean hartutako neurrietako bat, tamainu handiko hondakinak batzeako zerbitzua etetea izan da. Horrezaz gainera, zaborra modu seguruan kudeatuteko hainbat gomendio emon ditue.
Etxeko hondakinen bilketea mantenidu egiten da, baina kutsadura arriskuak gitxitzeko herritarrai eskatzen jakie eukiontzitik kanpo hondakinik ez ixtea, eukiontziak eskuakaz ez ikututea eta pedalai lehentasuna emotea. Eta gogora arazoten dabe, erosketak egiteko edo beste gauzetarako erabilitako latex edo nitriloko eskularruak ez dirala ontziak eta ez dirala eukiontzi horian bota behar, errefusa frakzinokoan baino.
Ontzi zuriaren bilketeari jagokonean, donazinoak etxean gordetzea gomendatzen dabe, egoera onean manteniduteko.

Gaixotasunak jotakoen zaborren kudeaketea
COVID-19ak kaltetutako eta kuarentenan dagozan personakaz kontaktua izan daben hondakinen edo materialen kasuan, honako hau da jarraibidea: gaixoaren hondakinak boltsa bikotxean gorde, biak itxiera hermetikoagaz, eta ondoren, errefusa frakzinoko ohiko hondakin boltsaren barruan gorde eta errefusa eukiontzira bota.

Udalekuak

Udarako osasun krisia gaindituta eta normaltasunera bueltauko garan esperantzeagaz, Dimako Udalak, Bediakoak eta Zaztaparrak Asti Taldeak ume eta gaztetxoentzako udalekuak prestatuten jarraituten dabe.
Bedian martiaren 2tik 19ra izan zan izena emoteko epea. 3 eta 5 urte bitartekoentzat dan Txiki-Txokoa eta 6 eta 12 urte bitartekoentzako udalekuak bagilaren 29tik garagarrilaren 10era dagoz aurreikusita. Bediako Uda Gaztean, 13 eta 15 urte bitartekoak Laidako kanpinera eta Ordesara dira joatekoak garagarrilaren 10etik 18ra, eta 15 eta 22 urteko gazteak Senegalera joango dira eskola bat atondu eta barriztatzeko eta hango umeakaz eskolaz kanpoko ekintzak egiteko. Plaza guztiak beteta dagoz.
Dimako Udalak, udalekutan eta Gazte Abenturan izena emoteko epea dauka zabalik hilaren 17ra arte. 2007 eta 2015 bitartean jaiotakoentzat udaleku irekiak; hau da Diman bertan goizetan, eta udaleku itxiak, kanpoan astebete, garagarrilaren 6tik 10era. Gazte Abentura barriz, 2002 eta 2007 artean jaiotakoentzako bagilaren 29tik garagarrilaren 3ra egiteko asmoa daukie.
Zaztaparrak be udalekuetako matrikulazino epea zabalik daukie aprilaren 5era arte. Udalekuetara joateko asmoa daukien umeak formulario bat bete behar dabe https://forms.gle/7EUuVbFwvBpqeXB3A estekan. Abuztuaren 3tik 14ra arte Oionen izango dira.

Aprileko ekintzak be bertan behera edo atzeratuta geratu dira

COVID-19a ez hedatzeko neurrien artean, alarma egoerea beste 15 egun gehiago, aprilaren 12ra arte luzatutea ebatzi eban Espainiako Gobernuak. Holan, ordurarte gitxienez, jarraituten dabe galazota kirol, kultur eta aisialdi ekintzak. Izan be, kiroldegiak eta kultur espazio guztiak zarratuta dagoz eta jenteak etxetik ez urteteko agindua dauka. Holan, aldez aurretik aprilerako programauta egozan ekintzak bertan behera geratu dira edo atzeratu ditue.

Arantzazun, aprilaren 2an, Kontrol penala eta feminismoaren inguruko berbaldia egoan programauta. Begoña Zabala, berbaldia emon eta justizia feministeak zelangoa izan beharko leuken hausnarketea bideratzekoa zan.
Artean, aprilaren 3rako aurreikusita egoan Oiane Valeroren Euskal langile andreak liburuaren aurkezpena. Ikerketa honetan Valerok, Euskal Herriko langile andrak bizi izandako nazino, klase eta sexu zapalkuntzak ikustarazoten dauz.
Bedian, aprilaren 1eko liburu-maleta ibiltaria geratu da bertan behera. Ikasturtean zehar egiten dan umeai zuzendutako jarduera honetan, Onditz Mendizabalek, ipuinetan murgildu, istorioak kontau eta sorkuntzearen bitartez personajeak landuten ditu.
Igorren, Laburbira emonaldia aprilaren 3rako egoan programauta, euskerazko 9 film labur, tartean Dimako bi. Munduari Jira eta Bira, umeai zuzendutako Gurutze Gorriaren interkulturalidadea landuteko proiektua be, bertan behera geratu da. Izan be, aprilaren 6tik 8ra, umeen eskoletako oporrak aprobetxauz ziran egitekoak eta konfinamentua luzatzean ezin izango da egin. Zapatu eta domeketako zineak be persianea bajatu dau. Eta andrak alkarregaz galapan egiteko Gu Be Bai Runners ekimena eten egin da.
Lemoan, aprilaren 4rako eukan antolatuta Karabie Gaztetxeak Sagardo Eguna. Egun horretarako, kalejirea, bazkaria, elektrotxarangea eta Raust eta Calling the Riot taldeen kontzertuak egozan programauta. LemoaHarrobi alebin futbol torneoa be aprilaren 18an zan jokatzekoa eta COVID-19a eteteko neurriak dirala-eta ez da jokatuko.
Zeanurin, Eguzkiolak antolatutako, Elda Barrerok bideratutako Arteterapia eta sormen tailerrak be bertan behera geratu dira.
Eskualdeko mendi taldeak antolatutako urtekerak, sagardo sasoia hasten dan honetan kuadrillak antolatutako txangoak, jubiladuak antolatuten dabezan ekintza guztiak... atzeratu egin dira, kasurik onenean, konfinamentua ez bada lar luzatuten; asko luzatu ezkero barriz, galdu.

Ikastaroen jarraipena kolokan
Gure eskualdeko herri gehienetan, yoga, pilates, zumba, eskulanak eta gimnasiaren mota bat edo beste antolatuten dabez udalak. Baita arte aplikatuak, jantzea, informatikea, sukaldaritzea, hizkuntzak eta beste arlo askotako ikastaroak be antolatuten dira ikasturte osorako prezio onean. Alarma egoerea dala-eta, eten egin dira danak. Egoera hau noz amaituko dan ez dago jakiterik baina horren arabera, klaseetara bueltauko dira edo ez dira bueltatuko ikasleak.
Ilgoran Arratiako Andren Jabekuntza Eskoleak be eten egin behar izan ditu hasita eukazan ikastaro bi. Inma Merino de Castrok emoten dauan Autoconocimiento y autoestima urtailaren 10ean hasi zanak, momentuz saio bi galdu ditu, martiaren 20koa eta aprilaren 3koa. Beste saio bat dauka maiatzaren 15ean Igorreko Kultur Etxean, momentuz ez dana bertan behera itxi. Monica Nuñezen eskutik Soñar, creer y crear ikastaroaren atzen saioa martiaren 18rako egoan programauta. Alarma egoerea bagilera arte ez bada luzatuten, saioak "berreskuratzen" saiatuko dirala azaldu deutso BEGITUri Bardintasun Teknikariak.
Mazala Andra Taldeak be martxan eukan Biografia humana tailerra. Martiaren 5ean hasita, bertan behera geratu dira martiaren 17 eta 26ko saioak. Hurrengoa, aprilaren 23an da eta kolokan dago. Osasun egoerea dala-eta, hartzean diran neurriak daukie atzen berbea.


Begitxio

Mezuak bialduteko espazio barri bat sortuko dau BEGITUk. Ez jakiez WhatsApp, Twitter eta sare sozialetan legez, momentuan helduko hartzaileai, hamabostean behin eta papelean baino; lehengo gutunen eta itxaron egin beharreko graziagaz. Espazio honen helburua etxetik urten ezin dan honetan jenteari adorea manteniduten lagundutea da eta persona konkretu bateri, talde bateri edo irakurle guztiai zuzendutako irakurleak bialdutako mezu animosoak jasoko dira bertan.
Bialtzaile bakotxak gura beste 250 karaktere inguruko mezu bialdu leikez begitu@topagunea.com helbidera.

Bialtzaile bakotxak gura beste 250 karaktere inguruko mezu bialdu leikez begitu@topagunea.com helbidera.

Etxean Hobeto Argazki Lehiaketea ipini dau martxan BEGITU Aldizkariak

Etxetik urten ezinda, goiari eusteko kolorea eta edertasuna inoz baino beharrezkoagoak dirala eretxita, Etxean Hobeto Argazki Lehiaketea ipini dau martxan BEGITUk. Alarma egoerea amaitu arte bialdu daitekez argazkiok, bost gehienez, begitu@topagunea.com helbidera eta hurrengo BEGITUn publikauko dira. Gainera, saria be izango dau momentuaz gozatzen gehien lagunduten dauan argazkiak. Saria, Garena jatetxean persona birentzako dastatzeko menua izango da, etxetik urten daitekenean konpainiaz disfrutetako.
Etxe barruan zein kanpoan leihotik edo balkoitik ikusi daiteken txokorik ederrenari erretratua egin eta bialdu begitura beste irakurleakaz partekatzeko. Egoera honetan inoz baino gehiago, momentu ederrak partekatzea alkartasuna da, eta lehiaketan parte hartzea solidario izatea.

Begitu  
Herriak
Kulturea
Kirolak
Begitandu
Begitu eta Zertu
Geure produktuak
Argazki eta bideoak
Zerbitzuak
Estekak
Begitulagunen txokoa
Hartu-emonetarako
Harpidetzak
Agendea
Iragarki laburrak
Inkesta
ZERTU Kultur Elkartea
Herriko Plaza 24, 48142 Artea
Telefonoa: 946 317 314

begitu@topagunea.com
Diseinua eta programazinoa: AIKOX INFORMÁTICA Y PUBLICIDAD