Paperezkoak - Azken Alea
Laster baten

Tonbola solidarioa Igorren

Dozena bat urte baino gehiago daroaz Igorreko Gabonetako tonbola solidarioak, Maribel Egiluz Congon eta Juanita Agirre Perun behar egiten daben Igorreko misinolarien proiektuak lagunduteko dirua batzean. Aurten, abenduaren 12tik 15era zabalduko ditu ateak 10:00etatik 13:00etara eta 17:00etatik 20:00etara Dimarako autobus geraleku parean dagoan lokalean, Sabino Arana 1 kalean.
Igorreko misinolarien proiektuak lagunduteaz gainera, saria eskuratu daiteke, era bitan: txartela saritua dalako edo, atzenengo egunean, sari barik gelditu diran txartel guztien artean egingo dan zozketan. Lehenengo kasuan, oparia eskuz egindako amantal, manta edo baserritar jantzia izan daiteke, besteak beste. Atzenengo egunean barriz, otzara bat zoz- ketatuko da. Sarien artean Beñat Etxebarria Athleticeko jokalari igorreztarraren kamisetea dago.

Gabon Jaia

Arratia Katekesi Taldeak urtero ospatuten dauan Gabon Jaia, Igorrekoai antolatutea tokau jakie aurten. Hilaren 14an izango da ospakizuna. Gabonen zentzua berreskuratu guran, "Gabonak Jesusen erara" da urte honetako gaia. Holan ba, jaialdian hartuko daben konpromisoa gabonetan "Jesusen jaiotzea Jesusen erara ospatutea izango da, Jesusek berak erakutsitako baloreakaz, beharrizan gehien daukien persona eta kolektiboak kontuan hartuta beti be". Zapia erabiliko dabe sinbolo moduan. Izan be, abendu hasikeran ume bakotxak zapia ipiniko dau zugatzean, zapi bardina Gabon Jaira eroango dau gero, eta barriro be etxeko arbolara bueltauko dau ospakizunaren ostean. Herri bakotxak, landutako balore bat adierazoko dau antzerki, bertso zein abesti bidez: austeridadea Bediak, gaixoak Lemoak, persona nagusiak Dimak, behartsuak Igorrek, migranteak Arteak, eta maitasuna Zeanurik.
Egitaraua: 17:00etan, harrerea trikitilariakaz eta Harribide Fundazinorako janari bilketea; 17:30ean, ospakizuna; 18:30ean, eleizatik eskoletako aterpera trikitilariakaz; 18:45ean, txokolatea eta bizkotxoak.

Aurrekontuetarako ekarpenak telefono mobikorretik be egin ahal dira

Areatzako Udaleko gobernu taldea 2020ko aurrekontuetarako herritarren ekarpenak jasoten dabil. Aurreko urteetan legez, hainbat bide daukiez horretarako. Beste batzuen artean, areatzapartehartzea@gmail.com helbide elektronikoa, udaletxean ipinitako postontzia edo app-a. Aurten gainera, Udalak, galdetegi bat prestatu dau herritarren eretxiak eta inpresinoak jasoteko. "Areatzako Udalak inkesta bat prestatu dau Udalean emoten diran zerbitzuak, zuzentzen diran arlo desbardinen eta egin beharreko inbersioai buruzko eretxi eta proposamenak batzeako" azaldu deutso BEGITUri Asier Garcia Areatzako alkateak. Inkesta hau udalaren webgunean dago eta Areatzapp aplikazinotik edo whasapp-etik jasoteko aukerea be badago. Abenduaren 10era arte bete daiteke.
Ekarpenak jaso, aztertu eta batzuk aurrekontuetan sartu ostean, hilaren 16an, 18:30ean, aurrekontuak aurkezteko batzarra egingo dabe Udal Aretoan. Bertan aurrekontuen helburu nagusiak eta proiektuak asetzea bilatzen dabezan betebeharrak azalduko dira. 2020ko aurrekontua 1.500.000 euro ingurukoa izango da.

Herritarren tresna
Herritarren parte hartzea garrantzitsutzat joten dau Udalak. Izan be, Udalaren lana kontroletako eta oreka ekononomikoa bermatuteko tresna garrantzitsuenetakoa da urteko aurrekontua eta diru publikoa zertan inbertidu gura daben adierazoteko aukera daukie herritarrak euren ekarpenen bidez.

Aurtengo bigarren Bonodenda prest

Areatzako Orburu Merkatarien Elkarteagaz alkarlanean, Udalak bigarrenez antolatu dau Bonodenda aurten. Urtailaren 4ra arte erabili ahal izango dira salmentara ateratako 400 bonoak. Oingoan, erosi eta gastau aldi berean egin ahal izango da.

Bonoak 20 eurotan erosteko aukerea egongo da udaletxean, eta 25 eurogaitik trukatu ahal izango dira herriko komertzioetan. Maiatzean baino bono gehiago aterako dira, orduan 300 atera ziran eta kanpaina honetan 400 dira. Udalak 2.000 euro ipini ditu bigarren kanpaina honetan. Erosketak Orburu Merkatarien Elkartea osotuten daben dendetan egin ahal izango dira.
Aurkeztutako NAN bakotxeko gehienez bono bi erosi ahal izango dira, beti be 16 urtetik gora euki ezkero. Bono bakotxa behin bakarrik erabili ahalko da hurrengo baldintzakaz: ez da dirurik bueltauko eta ordaindu beharreko kopurua 25 euro baino gitxiagokoa bada, bonoak metatu egin leitekez. Debekatuta egongo da be bonoen truke dirua jasotea. Barritasun lez, oingoan bonoak erosi eta segiduan gastetako aukerea emongo dau Bonodendak.
Maiatzeko lehenengo edizinoak euki zituen helburu bardinak dira oingoak, herria bizirik manteniduteko ezinbesteko dira herriko dendak, eta hori bultzatzea eta herrian erosten dabenak saritutea gura da. Udalak dei egiten ditu herritarrak erosketak herrian egin dagiazan, kanpaina honetan ez ezik, urte osoan zehar.

Ainhoa Romero lemoaztarra Bizkaiko torneoan txapelduna

Zemendiaren 30ean jokatu zan II. Bizkaia Txapelketako bikoteen finala Bilboko Bizkaia frontoian. Arratiara txapel bat ekarriko ebela, argi egoan, finala jokatu eben bikote bakotxean arratiar bat egoan eta. Izan be, Iera Agirre eta Ainhoa Romero lemoaztarra, Amaia Alday dimoztarra eta Nora Mendizabalen kontra neurtu ziran. Agirrek eta Romerok lortu eben txapela 22-12 emaitzeagaz. partidua irabazita.
Agirre eta Romero aurretik joan ziran denpora guztian markagailuan eta dimoztarrak eta gipuzkoarrak ezin izan eben ezer egin partiduari bueltea emoteko. Azkenean, Agirrek eta Romerok lortu eben txapela, txapelketako partidu guztiak irabazita.
Igaz baino jente gehiago egon zan harmailan partidua ikusten, 500 lagun inguru.

Pirritx, Porrotx eta Marimototsen ikuskizuna Zeanurin

Zeanuriko Kultur Batzordeak Gabonetarako antolatu dauan egitarauan, Bizi dantza pailazo ikuskizuna eskainiko dau abenduaren 15ean, domekan 17:30ean, Zeanuriko frontoian. Pirritx, Porrotx eta Marimototsek zemendian aurkeztu eben lan barria, Jon Maia eta Vanesa Castaño jantzariakaz alkarlanean. Sarrerak egun biz egongo dira salgai, udaletxe azpian. Abenduaren 2an herrikoentzat, 17:30etik 19:30era, eta abenduaren 3an, ordutegi bardinagaz, beste guztientzat. Abenduaren 4tik aurrera udaletxean bertan erosi ahal izango dira.
Jantzea bizitzako esparru danetara eroatea dau helburu ikuskizunak, barruko animalia plazara atera eta eurakaz jantzan egiteko konbitea luzatuten dabe Pirritx, Porrotx eta Marimototsek 70 minutuko familia-antzerkian.

Uckaia, Bullets of Misery eta The Eleventh Plague Kiņu Gaztetxean

Abenduaren 14an, zapatua, hardcore eta metal soinuak astinduko dabe gaua Kiñu Gaztetxean 21:00etatik aurrera. Uckaia, hardcore melodikoa egiten dauan taldeak, Gernikako Bullets of Misery thrash metal, death metal eta hardcore estiloko taldeak eta Bilboko The Eleventh Plague deathcore taldeak joko dabe. Borondatea izango da sarrerearen prezioa.

Uckaia
Aitor Ipiña (bajua) eta Ager Barragan (bateria) billaroztarrak, Lander Txabarri (ahotsa), Lander Elorriaga (gitarrea) eta Edu Fernandez (gitarrea) Arratia eta Galdakaoko kide gazteak osotzen dabe. Euren bigarren lana aurkeztuko dabe Arratian lehenengoz. Oin dala urte eta erdi lehen lan luzea atera eben My Mind, My Universe izenekoa. "Hainbat kontzertu jo doguz eta Euskal Herritik kanpora be heldu gara, Galiza, Madril, Valentzia, Asturias, Gaztela eta Leon..." dino Ipiñak. Oingoan autoekoitzitako hiru abestiko EP bategaz datoz, Introspection izenekoa. "Uste dogu gure musikea beste limite batera eroan dogula eta sano pozik gagoz emaitzeagaz!" azaldu dabe.

Bullets of Misery eta The Eleventh Plague
Gernikako bost musikarik 2008 urtean eratutako taldea da. Beti metal gogorraren bidetik old school eta aro barriko estiloa nahasten dabe "100% Original Rural Death" deritxaten estilo personala sortuz. Euskeraz abestutearen aldeko aldarria egiten dabe, (We growl in Basque!) dinoe. Summum Post Mortem atera eben 2015ean harrera sano onagaz eta 2018ko zemendian kaleratutako Linguae Vasconum Primitiae azken EPak, kritika ezin hobeak jaso ditu. "Kristautasun aurreko euskal kultura jentil iluna lantzean da bertan, inoz baino era bortitz eta oinarrizkoagoan". Taldearen indarra euren zuzeneko emonaldietan adierazoten dabe ondoen.
The Eleventh Plague Bilboko slamming deathcore taldeak ostera Cataclysm lehen 4 abestidun EPa argitaratu eban udan. Bost musikari gaztek osotzen dabe bandea. Bestalde, aurtengo Dimetal Fest jaialdian parte hartu eben. "Urte honetan hainbat oztopo topau doguz taldea aurrera eroateko bidean" dinoe, baina oin, gogo guztiagaz, euren musikea zabalduko dabe hainbat kontzertutan. Tartean abesti barriak sortzean dagoz.

Korrontzi, Areatzako Banda eta Arantzarte Igorren

Abenduaren 14an, 20:00etan, izango da ikuskizuna Lasarte Aretoan. Korrontzi folk musika taldea Agus Barandiaran trikitilariak sortu eban 2004an. Bere helburua, euskal musika herrikoiari eta bere lurraldeko antxinako hots tradizionalai beste ikuspuntu moderno eta garaikideago bat emotea zan, trikitixan oinarrituta eta txalapartea edo albokea lango beste instrumentu tradizional batzuk ardatz hartuta. Sonoridade barri hau lortzeako, musika estilo modernoagoez inguratu eta beste batzuen artean, mandolinea, baju elektrikoa, kontrabajua eta perkusinoen laguntzea izaten dau; Lasarte Aretoan, Areatzako Bandarena be bai.
Areatzako Bandak bere ibilbideari 1983 urtean ekin eutsan, San Bartolome jaietako kontzertuan. Harrezkeroztik, kontzertu ugari emon ditu, musika estilo gehienak landuz: sortzaile handien lan sinfonikoen adaptazinoak, film doinuak, musika garaikidea... Baita pieza herrikoiak eta jantza doinuak be.
Korrontzik eta Areatzako Bandak jotako doinuak jantzatzeko, Arantzarte jantza taldea izango da eurekaz. Arantzarte jantza taldeak 45 urte beteten ditu aurten, euskal jantzak Arratiako belaunaldi barriai irakasten eta mundu osoko plaza eta eszenalekuetan jantzan egiten.

Hile osorako programazinoa prestau dabe Zeberion

Zemendiaren amaieran hasi eta Gabonetako programazinoagaz lotu arteko kirol eta kultura jarduerak prestatu dabez Zeberion.
Taekwondoak emon eutsan hasikerea egitarau potoloari, zemendiaren 30ean eta abenduaren 1ean egindako erntrenamentu ireki eta erakustaldi eta tailerragaz. Hurrengoak, Euskerearen Eguneko jarduerak izango dira: Peru Tximaluze liburuaren irakurketa jarraitua eta euskaldun barrien esperientzien kontaketea.

Lehenengo hamabostaldia
Lehenengo hamabostaldi honetan, musika entzun eta txangoak egiteko aukerea egongo da. Holan, hilaren 10ean, 19:15ean, Musika Eskolako ikasleak entzunaldia eskainiko dabe udaletxean, eta hilaren 13an, barikuan, Bilboko Areatzako izotz pistara joateko hitzordua daukie gazteak, 18:15ean, Gaztelekuan. Bariku horretan bertan, 19:30ean, Laudioko Santa Luzia Abesbatzak kontzertua eskainiko dau Ermitabarriko San Antonio Ermitan, herrian geratu diranentzat.
Domekan, hilak 15, Austarri Mendi Taldeak Jaizkibeletik Donostiarainoko mendi martxea antolatu dau. Goizeko 07:30ean, plazan batuko dira partaideak. Eguerdiko 12:00etan, umeen pelota partiduak egongo plazako frontoian eta 19:00etan, Arratiako Tranbiaren erakusketearen inaugurazinoa udaletxean. Jon Urutxurtu historialariak kontauko dau tranbiaren historia.

Igorreko Lasarte Aretoak bazkide izateko kanpainea abiatu dau

"Gabonetan kulturea oparitu!!" lelopean Lasarte Aretoko bazkide txartela 5 euro merkeago egin edo barriztu daiteke urtailaren 3ra arte. Horretarako, Kultur Etxeko harrerara jo behar da, 10:00etatik 20:30erako ordutegian. Gabonetako kanpaina berezi hau martxan ipinten dan bederatzigarren urtea da.
Txartelagaz urteko ikuskizun guztietan %25eko deskontua izaten da, eta zuzeneko ikuskizun bat eta lau pelikula doban dira. Gainera, Euskal Antzoki Sareako antzoki guztietan, deskontuak egiten ditue Lasarte Aretoko bazkide txartelagaz. Txartela egiteko edo informazinoa jasoteko Igorreko Kultur Etxera hurbildu behar da edo 94 673 62 51 telefonora deitu.

Begitu  
Herriak
Kulturea
Kirolak
Begitandu
Begitu eta Zertu
Geure produktuak
Argazki eta bideoak
Zerbitzuak
Estekak
Begitulagunen txokoa
Hartu-emonetarako
Harpidetzak
Agendea
Iragarki laburrak
Inkesta
ZERTU Kultur Elkartea
Herriko Plaza 24, 48142 Artea
Telefonoa: 946 317 314

begitu@topagunea.com
Diseinua eta programazinoa: AIKOX INFORMÁTICA Y PUBLICIDAD