Paperezkoak - Azken Alea
Laster baten

Bide publikoen inbentarioa egiten dabiz

Udaletxean eskari asko jasoten ditue bideak norenak diran galdetuz eta horreei erantzuteko Areatzako Udalak bideen inbentarioa egitea ebatzi dau. Bertan, bideen izakerea finkatu eta bide bakotxari jagokon estatus legala izentauko jako, liskarrak ebitau edo modu egokian konpontzeko.
Inbentarioa egiteko, lurraldearen analisi kartografikoa eta landa lana buztartzen dira. Antxinako kartografia eta katastroa, idazlanak eta bildutako testigantzakaz egiten da analisia, bide bat publiko edo pribadua dan ondorioztatzeko. Ikerketa horren datuakaz, erakusketa publikoa egingo da, auzokideak alegazinoak aurkeztuteko. Gero behin-betiko proiektua aterako da, Udalbatzak onartu beharko dauana.
Sendo ingeniaritzeak hartu dau bere gain inbentarioa egiteko eginkizuna. Horretarako "bide publikoak artxiboetan bilatu, juridikoki zelan dagozan ikusi eta mapa historiko diferenteetan ikusten dabez bideak" azaldu deutso begituri Asier Garcia Areatzako alkateak.

Sendo ingeniaritza
Sendo ingeniaritzeak 1997an osotu eban lehenengo Bide Publikoen Inbentarioa eta ordutik Bizkaia, Gipuzkoa eta Arabako dozenaka udalerritan egin dabez inbentarioak. Geografia Informazioko Sistemen (G.I.S.) eta landa garapenera aplikaturiko ingeniaritzea erabilten dabe.

Hogeita sei tontorretara eroango dau Izan Bidea ekimenak presoak etxeratzeko aldarrikapena

Izan Bidea, preso eta igeslarien etxeratzearen aldeko ibiltarien sarea da. Euskal Herriak dituan biztanle adina kilometro, hau da 3.127.326 km egiteko erronkan oinarrituta, urri bigarrenaren 3an, Euskal Herriko 650 mendi tontorretara igoerea antolatu dabe. Euretako 26 Arratia, Ubide eta Zeberion dagoz eta Izan Bideaneko kamisetea soinean, mendiotara igoteko deialdia egin dau Sarek. Izena emotea zabalik dago http://650tontor.sare.eus helbidean eta antolatzaileak lehenbailehen egiteko eskatu dabe.
Edozein modutan igon daiteke: oinez, galapan, bizikletan... baina beti be motorrik erabili barik. Egindako kilometroak kuantifiketako Izan Bidean izeneko aplikazino bat dago, bideari ekin aurretik deskargau egin behar dana. Tontorrean, argazkiak atera eta sare sozialetan eskegiteko eskatzen dabe antolatzaileak.

Arratiako mendiak
Dinamikan parte hartzeako urri lehenengoan Arratian igon daitekezan mendiak hurrengoak dira: Aldamin (Zeanuri), Altungana (Zeanuri), Apario (Igorre/Lemoa), Arralde (Ubide), Arrugaetako atxa (Zeberio), Artanda (Zeberio), Artaungan (Dima), Bargondiko atxa (Dima), Eneabe (Ubide), Errialtabaso (Dima), Gantzorrotz (Dima/Zornotza), Garaio (Dima), Gatzarrieta (Zeanuri), Gorbeia (Zeanuri), Ilunbe (Areatza), Lekanda (Zeanuri), Lemoatxa/Gantzabal (Lemoa), Leungana (Dima/Mañaria), Mandoia (Bedia/Zeberio), Murga (Artea), Santiagozar (Bedia/Lemoa), Untzueta (Zeberio), Upo (Areatza), Urrekoatxa (Dima), Urtemondo (Dima) eta Zanburu (Zeanuri).

Ezohiko bonu kanpainea Igorren

Herriko merkataritzea bultzatzeko Igorreko Udalak eta AMEk Igorreko merkatari alkarteak, urtero egiten ditu bonu kanpainak aprilean. Aurten, aprilean konfinamentua egon zan eta udan egin da ohiko kanpainea. Ha-ta guzti be, urrietan beste kanpaina bat ipini dabe martxan, COVID-19a dala-eta, hartutako neurrien ondorioak arintzeko.

Urri lehenengoaren 15etik , urri bigarrenaren 15era egongo dira bonuak eskuragarri.
Bonuokaz %33 merkeago ateraten dira erosketak. "Kanpainea COVID-19a dala eta ezohiko kanpainea da, egoera honetan familiai bereziki ondo etorriko jakielako laguntzea eta komertzioai be bai" azaldu deutso begituri Illart Gumuzio Igorreko alkateak. Igorreko 51 establezimentutan erabili daitekez Bonodenda bonuak.

Urrietako ezohiko kanpainea
Kanpaina honetan 1.750 bonu bananduko dira, bakotxa 15 eurokoa, 10 euro pagauta. Gehienez bonu bi pilatu daitekez erosketa bakotxeko. Sabadell Guipuzcoano bankuko Igorreko bulegoan erosi daitekez bonuak astelehenetik barikura 08:30etik 11:00etara.

Zabalik dago izen emotea Kubulu Euskaltegian

Klaseak presentzialak izango dirala aurreikusten dabela, egoereak posible egiten badau, azaldu deutso begituri Arratiako AEK-ko irakasle batek. Maila guztietako ikastaroak eta ordutegi zabalak izatea aurreikusten dabe. Izen emotea urri lehenengoaren 2an zabalduko da eta Kubulu Euskaltegian bertan egin daiteke, telefonoz 94 631 56 57 edo 607 632 916 telefonoetan eta arratia@aek.eus helbide elektronikoan.

Kulturarako bonuak atera ditu Bizkaiko Foru Aldundiak

Bizkaia Aurrera Kultura Bonu (BAKB) izenpean, Bizkaian kultura konsumoa bultzatzeko asmoz, bonuak kaleratu ditu BFAk. Bi bonu mota dira, 15 eta 25 euroan salgai ipini diranak eta 40 euroko balioagaitik trukatuko diranak. Bonuak 2021eko maiatzaren 31ra arte erabili ahal izango dira.
Bonuetarako 500.000 euro ipini ditu BFAk. Ekimenak CECOBI eta Kutxabanken laguntzea dauka. Bi motatako bonuak dira. A motakoakaz, 25 euroko preziokoakaz, edozein motatako kultura produktuak erosi ahal dira: liburuak, musikea, filmak, dokumentalak, jokoak, bideo-jokoak eta museo, zinema, antzerkia, jantza eta kontzertuetarako sarrerak. Mota honetako 17.000 bonu ipini dira salgai. B motakoak barriz, 15 euroko prezioan erosi eta euskerazko kultur produktuak erosi daitekez; baita Bizkaiko tokiko hedabideetarako harpidetzak be, BEGITUrako harpidetzea, berbarako. Holango 9.800 bonu ipini dira salgai.

Bonuak Kutxabankeko webgunearen bidez erosi daitekez. Persona bakotxak kategoria bakotxeko 4 bono erosi ahal dauz gehienez. Beraz aukera guztiak aprobetxetan dauzanak, 160 euro pagauta, 320 euro izango ditu kulturan gastetako programari atxikitutako establezimentuetan.

Begitu-lagun 15 euroan
Bonu honeek Begitu-lagun izateko aukera parebakoa eskaintzen dabe. Bonuakaz, Begitu-lagun barriak 15 euro pagauko ditu, eta begituk 40 euro jasoko dauz. Opari moduan, telazko boltsa bat, besoko argi islatzailea eta zortzi liburu jasoko ditu Begitu-lagun barriak eta Garena jatetxean lagun birentzako degustazino menuaren zozketan sartuko da.
Liburuok Angel Larrea eta Juan Rekalderen Arratia Inguruko Hiztegia eta Berbategitxoa, Alvaro Rabelliren Ustezko fikzioak eta Saguzarren profhezia, Peru Tximaluze alemaniar ipuin klasikoaren euskerazko bersinoa, Arratia Musika Eskolako 25 urteurreneko monografia eta Iker Yurrebasoren Haizea aurpegian dira. Nerea Zuloaga eta Iratxe Andikotxearen Kontaidazu! Kantaidazu! ipuin eta abestien liburu-CDa be eroango dabe Begitu-lagun barriak.
BEGITU hobetuteko baliabide ekonomikoak behar dirala eta 2020ean, 50 Begitu-lagun barri egiteko kanpainea dago martxan.

Programan parte hartzeako
Programan parte hartu gura daben establezimentu edo erakundeak edozein momentutan atxiki ahal jakoz BAKBri, Kutxabankek bere webgunean horretarako daukan izen-emote orria beteta. Bonuak diruz trukatzeko, Biz- kaiko Foru Aldundiko Euskara, Kultura eta Kirol Sailera bialdu beharko dauz, salmentearen ordainagiriaren kopiagaz batera. Trukea astean behin egin ahal izango da bagilaren 30era arte.

Aurkezpen ekitaldia
Urri lehenengoaren 4an izan zan BAKB programearen aurkezpen ekitaldia. Lorea Bilbao Euskara, Kultura eta Kirol diputadua, Pedro Campo CECOBIko presidentea eta Xabier Solaetxe Kutxabankeko Bizkaiko sareko zuzendaria egon ziran, hainbat kultur disziplinatako artistakaz batera.

Euskaraldia prestatzen

2018an egin zan moduan, belarriprestak eta ahobiziak euren egunerokoan euskereak indarra hartzeako ariketea egingo dabe aurten be. Baina, aurten norbanakoez gainera taldeak be hartuko dabe parte Euskaraldian, eta entidadeak be neurriak hartuko ditue hizkuntza praktika barriak bultzatzeko. Entidadeen izena emoteko epea hilaren 27ra arte da eta norbanakoena 24an zabalduko da. Zemendiaren 20tik abenduaren 4ra bitartean, izango da Euskaraldia.
Hizkuntza ohiturak aldatuteko, entidadeak euskeraz berba egiteko gai diran hizkuntz taldeak identifikauko dabez lehenengotik, ariguneak. Ariguneak mota bikoak izan daitekez: barne ariguneak eta kanpo ariguneak. Barne ariguneak entidadearen barruko funtzionamentuko taldeak dira. Kide guztiak euskerea ulertu behar dabe eta gitxienez taldekoen %80 ahobizi edo belarriprest moduan taldean parte hartzeako prest egon beharko da. Kanpo ariguneak barriz, entidadea eta herritarren arteko hartu-emon espazioak dira. Horreetan, beti egongo da ahobizi edo belarripresten bat herritarrakaz euskeraz egiteko.
Mota guztietako entidadeak hartuko dabe parte Euskaraldian: erakunde publikoak, gizarte eragileak, enpresak, kultur eta kirol taldeak eta abar. Arratian, be mota guztietako entidadeak emon dabe izena parte hartzeako; BATZ S. Koop. tartean.
BATZek, Euskera Plana guztiz inplementauta dauka eta Errota Fundazioko EusGara egitasmoan dago. "Euskaraldian emon dogu izena, gure xedeagaz bat etortzeaz ez ezik, hizkuntza ohitura barriak sortzeako talde erabakian oinarritutako ariketa dalako" dinoe BATZetik.

Ahobizi eta belarriprest
Hilaren 24tik aurrera norbanakoak be emon ahal izango dabe izena, ahobizi edo belarriprest moduan ariketan parte hartzeako. Ahobiziak euskerea ulertzen daben guztiakaz euskeraz egingo dabe Euskaraldian. Lehenengo berbea beti euskeraz egingo dabe eta besteak euskeraz ulertuten ez badau bakarrik pasauko dira erderara.
Belarriprestak barriz, euren euskera gaitasunaren arabera ebazten dabe euskeraz noz eta nogaz egin. Euskeraz dakienak eurai euskeraz egiteko eskatzen deutsee, belarriprest izanda.

Begitu  
Herriak
Kulturea
Kirolak
Begitandu
Begitu eta Zertu
Geure produktuak
Argazki eta bideoak
Zerbitzuak
Estekak
Begitulagunen txokoa
Hartu-emonetarako
Harpidetzak
Agendea
Iragarki laburrak
Inkesta
ZERTU Kultur Elkartea
Herriko Plaza 24, 48142 Artea
Telefonoa: 946 317 314

begitu@topagunea.com
Diseinua eta programazinoa: AIKOX INFORMÁTICA Y PUBLICIDAD