Hilaren 20an, enplegua topetako azokea egongo da Igorreko Kultur Etxean. Igorreko jenteari enplegua bilatzen laguntzeko asmoa daukan Beharbide proiektua bigarren fasean sartu da eta enpresen beharrizanetan oinarritutako lan programearen ostean, enpresai laguntzea emoteko eta lana topatzeko aukerak handitzeko antolatu dabe azoka hau. Azokak ateak zabalik izango ditu goizeko 11:00etatik, arrastiko zazpirak arte.
Bertan, enpresa eta lan-eskatzaileak euren arteko kontaktuak egiteko aukerea izango dabe, beharra topatzea erreztu ahal dauan beste gauza askoren artean.

Eremu bi
Azokea eremu bitan bananduta egongo dala azaldu dau Nadia Maestro Aldalanekoak. Baten 2013an egindako lana erakutsiko da eta 2014an Igorreko Udalak beharra topatzen lagunduteko eskeiniko dituan tailer eta ikastaroen barri emongo da. Bestean, lan-boltsak egongo dira, "60 lan-boltsa inguru. 55 enpresak curriculumak jasoteko eskatu deuskue, dagozan edo etorkizunean egon daitekezan lanpostuak beteteko" dino Maestrok. Bertara hurreratzen diran igorreztarrak euren curriculumak eroan eta izena emon ahal izango dabe interesetan jakiezan lan-boltsetan. Azokan bertan informazino personalizaua jasoteko aukerea be badago, 94 602 62 09 telefonora deituta edo beharbide@aldalan.com helbidera idatzi ezkero.

Berbaldiak
Azokan berbaldi bi egongo dira. 12:00etan, inguruko enpresa batek lan merkadua zelan ikusten dauan azalduko dau eta 18:00etan lana bilatzeko tresnen eta gaitasun profesionalen gainean izango da berbaldia.