Eguzkiola alkarteak, basogintza inguruan hausnarketea egiteko berbaldiak, dokumentala eta mahai-ingurua antolatu dauz urtailaren 16, 17 eta 18rako Eguzkiolako lokalean. Jardunaldi honeen helburua, itaun biri erantzutea da: "Zer daukagu gure inguruko basoetan?" eta "Ze baso eredu nahi dogu?"
Lehenengo egunean, hilak 16, 18:00etatik aurrera, lehenengo itaunari erantzuteko, Haritza Iturbek Arratiako basogintzea aztertuko dau, zenbait espezieren azterketa teknikoa eginez. Ondoren, 18:30ean, Iker Yurrebasoren Baso ahaztuak dokumentala ikusteko aukerea egongo da.
Hilaren 17an, 19:00etan, Keko Alonso biologoak Basogintza, eta orain zer? izeneko berbaldia emongo dau. Bertan, Alonsok basogintzearen azterketea egingo dau eta Kolore Guztietako Basoak proposamenaren barri emon.
Barikuan barriz, gura dogun baso ereduaren gaineko azterketea egingo dabe 19:00etan, Eguzkiolako lokalera hurreratzen diranak. Arlo desbardinetako adituak osotutako mahai-ingurua egongo da.